Waajiriwa wapya Halmashauri ya Mji wa Babati waaswa kujiepusha na vitendo vya Rushwa katika majukumu yao.

Imechapishwa: April 11th, 2025

Jumla ya waajiriwa wapya 102 wa kada mbalimbali Halmashauri ya Mji wa Babati wamepewa Mafunzo ya Utumishi katika Ukumbi wa Halmashauri ya Mji.

Mafunzo hayo yamefunguliwa na Kaimu Mkurugenzi wa Halmashauri ya Mji wa Babati Bw.Simon R. Mumbee na mafunzo hayo yametolewa na Idara ya Utawala kwa kushirikiana na Taasisi mbalimbali kwa lengo la kuwawezesha Watumishi kutambua stahiki zao,kutambua wajibu na kuzingatia kanuni na maadili ya Utumishi wa Umma.

Bw. Pasko Mhagama Mkuu wa Dawati la kuzuia Rushwa Wilaya ya Babati amewataka Watumishi kuepukana na vitendo vya Rushwa katika kazi kama kujilimbikizia mali za Umma, kutaka hongo wakati wa utoaji huduma na matumizi mabaya ya madaraka.

Sambamba na hilo Watumishi wameaswa kujiepusha na mikopo holela ili waweze kupata Maendeleo na kufanya kazi kwa utulivu na weledi.