TALGWU Kuhakikisha Wanawake wanaheshimika Makazini

Imechapishwa: March 8th, 2021

Na Nyeneu, P. R (Kaimu Afisa Habari)

Picha zote Na Nyeneu, P. R

Mkuu wa Wilaya ya Babati Mhe. Twange, ambaye alikuwa mgeni rasmi akimuwakilisha Mkuu wa mkoa, ameyapokea kwa furaha kabisa maandamano ya wanawake Mkoa wa Manyara katika kilele cha Maadhimisho ya Siku ya wanawake Duniani Mkoani humo yaliyofanyika Babati Mjini, huku wakiwa wamebeba mabango kutoka taasisi mbalimbali yenye ujumbe uliosomeka “Wanawake Katika Uongozi, Chachu kufikia Dunia yenye Usawa” ikiwa ni kaulimbiu ya siku ya wanawake Duniani kwa mwaka 2021.

Aidha, mjumbe wa kamati ya utendaji ya chama Taifa Chama cha Wafanyakazi wa Serikali za Mitaa (TALGWU) Mkoa wa Manyara Bi. Devotha Edwin Mbonamasabu katika maazimisho ya siku ya wanawake Duniani Machi 8 2021, amesema kazi kubwa ya Chama ni kuhakikisha mustakabali wa wanawake kupitia kamati ya ushauri ya wafanyakazi wanawake unalindwa na wafanyakazi wanawake wanaheshimika makazini.

Pia, Mhe. DC aliweza kuzindua maonyesho ya wajasiriamali wadogo na wa kati yaliyodhaminiwa na Kampuni ya Vinywaji ya Mati Super Brand Limited mjini Babati.

“Sisi kama Mati Super Brand Limited tumedhamini maonyesho haya ya wajasiriamali wadogo na wa kati Babati Mkoani Manyara kwaajili ya kuweza kuunga mkono juhudi za Serikali katika kuwainua wajasiriamali na kuweza kujenga uchumi.” Alieleza meneja Mauzo na Masoko.

Sambamba na hilo, Mkuu wa Mkoa Mhe. Joseph J Mkirikiti akiambatana na Rais wa Shirikisho la mpira wa Kikapu Tanzania (TBF), Bw. Phares Magesa, Mkuu wa Wilaya ya Babati Mhe. Lazaro J Twange, Katibu Tawala Wilaya Ndg Halfan Matipula Pamoja na viongozi na wadau mbalimbali rasmi wameuzindua uwanja wa Mpira wa Kikapu Mjini Babati mara tu baada ya Maadhimisho ya siku ya wanawake Duniani Pamoja na maonyesho ya Wajasiriamali wadogo kufikia mwisho.

Uwanja huo wa kisasa umegharimu pesa taslimu zisizopungua Shilingi Milioni 10, umejengwa kwa nguvu za wadau mbalimbali mjini Babati, ambapo wadau walijitolea kuchangia vitu, fedha na nguvu kazi.

“Mheshimiwa Mgeni Rasmi, napenda kuchukua nafasi hii kukueleza wazi kabisa, hadi uwanja huu unakamalika, wananchi wa mkoa wa Manyara hususani wa mji wa Babati wamejitolea kutoa kokoto karibia trip 16, mchanga trip 12, mawe trip 10, mifuko ya simenti 176” Alifafanua zaidi Afisa Michezo Mkoa

Vile vile akina mama wa Sokoni hawakukubali kuwa nyuma katika kuhakiksha uwanja wa Mpira wa Kikapu Unajengwa na kukamilika, ambapo wao walijitolea nyanya, vitunguu, mboga mboga pamoja na vitu vingine, pia watu wenye maduka walitoa mchele na wenye mabucha walitoa nyama ili kuhakikisha mafundi wanaweza kula.

Aidha, Uongozi wa Michezo mkoa wa Manyara umejiwekea malengo ya kujenga kiwanja kila baada ya Mwezi mmoja na pia kuhamasisha kila halmashauri mkoani humo kuiga mfano wa watu wa Mji wa Babati ili waweze kujenga viwanja kwenye halmashauri zao.

Bw. Phares Magesa katika hotuba yake amewapongeza sana wana Babati kwa moyo wao wa kujitolea katika ujenzi wa viwanja tena kwa nguvu zao wenyewe. Hii itapelekea kuwepo na viwanja vya kutoka baada yam waka mmoja. Katika kuunga mkono juhudi hizo, Bw. Magesa amekabidhi mipira miwili ya Mpira wa Kikapu kwa timu mbili za Mchezo huo.

Baada ya Mhe. Mkuu wa Mkoa kumaliza zoezi la uzinduzi wa uwanja huo, kukawa na Mashindano ya Mpira wa kikapu ambapo timu ya Tanzanite iliumana vikali na Timu ya Tarangire. Timu ya Tarangire iliweza kuichapa bila huruma timu ya Tanzanite Vikapu 103 kwa vikapu 81.

Wakati huo huo kulikuwa na mtanange mkali wa mpira wa miguu ambapo timu ya Matipa FC iliweza kutoshana nguvu na timu ya Boda Boda FC baada ya kutoka sare ya magoli 1 kwa 1.